Den lokale komiteen for TV-aksjonen har planane klare. Svein Arne Orvik

Pengane frå aksjonen går i år til å hjelpe barn ramma av kreft og andre alvorlege sjukdomar: Det skal etablerast familiehus i Tromsø, Bergen, Trondheim og Oslo der alvorleg sjuke barn kan vere saman med familien.

Her finn du den digitale bøssa.

Komiteen i Herøy er i full gang med å førebu aktivitetar for å få samla inn mest mogleg. Nedanfor ser du noko av det som er planlagt. TV-aksjonsdagen er 20. oktober, men det skjer mykje på andre datoar også. 

Merk at det ikkje kjem bøsseberarar på dørene i Herøy.

Sentrumsløpet

Fredag 18. oktober klokka 15.00 vert det sentrumsløp i Fosnavåg (tidlegare kjent som rådhusløpet).

– Vi oppmodar alle kommunale avdelingar og lokale bedrifter i kommunen om å stille, seier ordførar Tine Storøy.

Ordføraren har utfordra ungdomsrådet til å delta i løpet. Ho vil betale inn til TV-aksjonen ut frå talet på runder dei spring.

Fosnavåg i 100 og 200 – ein folkefest

Laurdag 19. oktober klokka 10.00 blir Fosnavåg sentrum fylt med liv og røre.

Folk som er i sentrum vil bli minna om å støtte TV-aksjonen.

– Eg oppmodar folk om å arrangere tombola, kakesal, ansiktsmaling eller ha andre kjekke aktivitetar til inntekt for denne gode saka. Kvar krone tel, seier ordføraren.

 «Den viktigaste konserten i år»

Søndag 20. oktober klokka 17.00 går «Den viktigaste konserten i år» av stabelen i Fosnavåg konserthus.

Thon Hotel Fosnavåg vil lage kake og kaffi og du kan gi ditt bidra til TV-aksjonen.

Programleiarane er Marthe Salvatierra, Fride Myklebust og ordførar Tine Storøy.

På programmet står lokale bidragsytarar:

• Kulturskulen: song, dans og musikk
• Kvalsvik og Nerlandsøy skulekorps
• «Kor kjekt» – demenskoret
• Herøy knøttekor frå kyrkja
• Even Nykrem
• Bergsøy skulekorps: drill
• Eliza og Veronica frå kvalifiseringssenteret

Lat oss stå saman om å støtte TV-aksjonen og menneske i sårbare situasjonar!