Eileen Gjerde

Dagen byr på ei sakte reise med tid til godt samvær, felles måltid, stillheit, pilegrimsinnhald og vakre naturopplevingar, og arrangementet er eit samarbeid med Brekkegarden i Gjerdsvika og kyrkjene i Herøy.
 
Pilegrimsferda startar på Herøy gard om morgonen, før sunnmørsjekta “Anna Olava” tek fylgjet til Moltustranda. Vidare vert fylgjet leia over fjellet frå Moltustranda via Sædalen til Gjerdsvika og Brekkegarden. Der kan besøkande kjøpe mat og drikke, og delta på pilegrimssamling i den vakre rosehagen. På ettermiddagen returnerer Sunnmørsjekta frå moloen i Gjerdsvika tilbake til Herøy gard. 

Det er også mogleg å å fylgje jekta frå Moltustranda til Gjerdsvika, eller å vandre på eiga hand frå Gursken eller Haugsbygda til Gjerdsvika. Arrangementet i Brekkegarden er ope for alle, og besøkande er velkomne til å møte direkte der. 

Program for laurdag 5. oktober:

9.00 Oppmøte Herøy gard og moglegheit til å kjøpe pilegrimspass, materiell og stemple passet
9.30 Avgang med sunnmørsjekta “Anna Olava” frå Herøy gard
9.50 Ankomst med “Anna Olava” til Moltustranda 
10.00 Leia vandring frå Moltustranda til Gjerdsvika (ca. 10 km)
13.00 Arrangement med mat, drikke og pilegrimssamling på Brekkegarden
14.30 Vandring frå Brekkegarden til Moloen i Gjerdsvika
15.00 Avgang med “Anna Olava” frå Gjerdsvika
16.00 Ankomst med “Anna Olava” til Herøy gard

Her finn du meir informasjon om pilegrimsferda og bestilling av billettar til jekteturen og middag i Brekkegarden.

Brekkegarden ligg idyllisk til inst i Gjerdsvika i Sande kommune. I hovudbygninga kan besøkandeovernatte i autentiske omgjevnader . Brekkegarden

Hovudhuset i Brekkegarden vart bygd i 1893, og tilbyr overnatting til pilegrimar og andre gjester.  Sjølv om bygninga er fullstendig restaurert, er alle dei opphavlege elementa, inkludert tømmerveggane, teke vare på. Garden er ein del av den norske NaCuHeal - stiftinga. NaCuHeal står for Natur, Kultur, Helse, og hovudmålet til stiftinga er å fremje helse, lykke og livskvalitet gjennom eit heilheitleg syn på samanhengane mellom kunst, helse og natur. Booking og meir informasjon om Brekkegarden finn du her.

Herøy gard er, saman med Giske og Borgund, ein av tre nøkkelstadar langs kystpilegrimsleia på Sunnmøre.  Stadane er valt som stoppestad for pilegrimar grunna si historiske interesse, og meir enn tusenårig lange og sentrale plassering langs hovudleia for skipstrafikken langs kysten. Sunnmørsjekta “Anna Olava” er ein kopi av ei jekt på Sunnmøre slik ein meiner den var utforma på 1700-1800 talet. Båten er ein del av museet, vert drifta av ei gruppe frivillige, og nytta mellom anna til pilegrimsaktivitetar. 
Her kan du lese meir om St.Olavsvegane til Trondheim.

Pilegrimar om bord på sunnmørsjekta "Anna Olava" på veg frå Herøy til Valldal. Eileen Gjerde

St.Olavsvegane til Trondheim er del av Europeiske Kulturruter, som er eit program i regi av Europarådet som samlar nettverk med eit tema eller ein verdi som er felles for Europa. Ei rute kan vere ei historisk lei som St.Olavsvegane til Trondheim, eit historisk handelsnettverk som Hansa eller eit temabasert nettverk som Réseau Art Nouveau som samlar lokalitetar i Jugendstil. Her kan du få inspirasjon og lese meir om dei 48 ulike kulturrutene i Europa.

Pilegrimar på vandring mellom Sandivka og Røneset i Storfjorden. Eileen Gjerde